منگل کو سپریم کورٹ رجسٹری لاہور میں نجی میڈیکل کالجز کی جانب سے زائد فیسوں کی وصولی کیخلاف ازخود نوٹس کی سماعت چیف جسٹس  کی سربراہی میں 2رکنی بینچ نے کی ۔

چیف جسٹس نجی کالجز میں زائد فیسیں وصول کرنے پربرہم ہوئے اور کہا کہ میڈیکل کالج کا اسٹرکچر بتایا جائے، نجی میڈیکل کالجز کے مالکان کے بینک اکاؤنٹ کی تفصیلات بھی فراہم کی جائیں ۔انہوں نے ریمارکس دیئے کہ پرانی تاریخوں میں داخلے کی کوشش ہوئی توکالج مالکان ذمہ دار ہوں گے،ان کا کہنا تھا کہ ذاتی نمائش کیلئے سماعت نہیں کررہے۔

دوران سماعت چیف جسٹس نے خود پر ہونے والی تنقید کا جواب دیتے ہوئے کہا کہ میو اسپتال کا دورہ کرنے پر تنقید کی گئی جہاں بچوں کا مسئلہ ہوگا وہاں خود جاؤں گا،معاملہ عوامی مفاد کا ہے، اس اہم معاملے پر ہفتے اور اتوار کو بھی سماعت ہوگی۔چیف جسٹس ثاقب نثار نے تمام نجی میڈیکل کالجز میں داخلے روکنے کا حکم دیتے ہوئے، کالج  مالکان کو کل سپریم کورٹ لاہور رجسٹری میں طلب کرلیا۔