دنیا کے امیر ترین شخص برنارڈ آرنلٹ کی دولت میں ایک دن میں 11.2 ارب ڈالرز ( 32 کھرب 17 ارب پاکستانی روپے سے زائد) کی بڑی کمی آئی ہے۔

رپورٹ کے مطابق پرتعیش اشیا بنانے والی کمپنی ایل وی ایم ایچ کے مالک برنارڈ آرنلٹ دنیا کے امیر ترین شخص ہیں اور وہ اپریل میں 200 ارب ڈالرز سے زیادہ دولت کے مالک بننے والے دنیا کےتیسرے فرد بھی بن گئے تھے لیکن ڈیڑھ ماہ بعد ہی ان کی دولت 11.2 ارب ڈالرز کی کمی کے بعد 192 ارب ڈالرز تک پہنچ گئی ہے۔

ان کی دولت میں آنے والی کمی کی وجہ امریکی معاشی صورتحال ہے جس کے باعث خدشات پیدا ہوئے ہیں کہ پرتعیش اشیا کی طلب میں نمایاں کمی آسکتی ہے۔ ان کی دولت میں ایک دن کے دوران نمایاں کمی آئی ہے لیکن 2023 کے دوران برنارڈ آرنلٹ کی دولت میں مجموعی طور پر 29.5 ارب ڈالرز کا اضافہ ہو اہے۔ اس کمی کے بعد برنارڈ آرنلٹ اور دنیا کے دوسرے امیر ترین شخص ایلون مسک کے درمیان فرق گھٹ کر محض 12 ارب ڈالرز کا رہ گیا ہے۔

ایلون مسک اس وقت 180 ارب ڈالرز کے مالک ہیں اور اس بات کا امکان ہے کہ آئندہ چند روز میں وہ ایک بار پھر دنیا کے امیر ترین شخص کا اعزاز اپنے نام کرلیں گے۔برنارڈ آرنلٹ اپنی کمپنی کے 41.4 شیئرز کے مالک ہیں اور ان کی دولت میں اضافہ یا کمی کا انحصار حصص کی قیمتوں پر ہوتا ہے۔

ان کی کمپنی کے حصص کی قیمت میں 23 مئی کو 5 فیصد کمی آئی تھی۔ایل وی ایم ایچ اپریل میں پہلی یورپی کمپنی بنی تھی جس کی مارکیٹ ویلیو 500 ارب ڈالرز سے تجاوز کر گئی تھی۔