بچپن سے سنتے آرہے ہیں کہ ہمارا ملک نازک صورتحال سے گزر رہا ہے اور اس سے نکلنے کا ایک ہی حل ہے کہ ہم آئی ایم ایف کے فیض سے مشرف ہوں۔ غالب کی طرح قرض پر کھانے پینے کی عادت بہت بری ہوتی ہے۔ ہم بطور قوم قرض کے عادی ہوگئے ہیں اور بڑی آسانی سے ہر آنے والی حکومت قرض لینے کو ضروری اور اس کی ذمہ داری ماضی کی حکومت پر ڈال دیتی ہے۔ یوں یہ سلسلہ چلتا رہتا ہے اور ہم پہلے سادہ مقروض ہوئے، پھر مقروض تر ہوئے اور اب مقروض ترین ہوگئے ہیں۔ ویسے تو مقروض عزت، غیرت اور حمیت پروف ہوتا ہے اور اسے کسی کے کہنے سننے سے کچھ فرق نہیں پڑتا۔ ہم نے بھی کمال کیا ہے، آئی ایم ایف سے وعدے کرکے آتے اور یہاں امریکی اور مغربی جامعات کے فیض یافتہ بابو اپنے کیے وعدوں کو وفا نہ کرتے تھے۔ اس کا نتیجہ یہ نکلا کہ ایک دن حکم ملا اگر قرض لینا ہے تو سٹیٹ بنک کا چیئرمین ہم لگائیں گے۔ مرتے کیا نہ کرتے، سر تسلیم خم کرتے ہوئے سٹیٹ بنک کو ان کے حوالے کر دیا۔ یہ عجیب بات ہے کہ سٹیٹ بنک کو ان کے حوالے کرنے کا مطلب سکیورٹی رسک تھا کہ ہم کس جگہ کتنے پیسے لگا رہے اور ہمارے کیا کیا منصوبے ہیں، وہ سب ہم سے پہلے وہاں پہنچ جاتے، جن کے لیے یہ ادارے بنائے گئے ہیں۔

ویسے آپ کے علم میں اضافے کے لیے بتا رہا ہوں کہ آئی ایم ایف کا بنیادی مقصد ممبر ممالک کی اقتصادی مدد کرنا بتایا گیا ہے۔ وہ مدد تو خاک کرتے، ہمارے معزز وزراء کے بقول وہ ایک ارب ڈالر کے لیے ناک سے لکیریں لگوا رہے ہیں۔ ہمارے وزیر خزانہ صاحب چیخ رہے ہیں کہ ہم بھکاری نہیں ہیں بلکہ عزت مند ممبر ملک ہیں اور ہماری تحقیر کی جا رہی ہے۔ جی ڈار صاحب بالکل ہماری توہین ہو رہی ہے، کچھ ناسمجھ سیاسی مخالفت میں اس پر خوش ہیں کہ آئی ایم ایف ٹھیک کر رہا، ایسا سوچنا درست نہیں، یہ اسحاق ڈار کی نہیں پاکستانی وزیر خزانہ کی توہین ہے۔ ڈار صاحب آپ نے بھری بزم میں راز کی بات کہہ دی ہے کہ ہم جیو پولیٹکس کا شکار ہو رہے ہیں اور جو بھری بزم میں راز کی بات کرے اور وہ راز بھی بین الاقوامی استعمار کے ایجنڈے کو بے نقاب کرنے والا ہو تو پھر آئی ایم ایف کے فیصلہ ساز تو آپ کی کچھ نہیں سنیں گے۔ ڈار صاحب نے درست کہا کہ ہمیں اتنی خود مختاری تو دو کہ ہم یہ فیصلہ کرسکیں کہ کہاں کتنا ٹیکس لگانا ہے، یہ ڈار صاحب کے دل کی تکلیف ہے کہ انہیں اندازہ ہو رہا ہے کہ ہم آئی ایم ایف کے جال میں اس قدر پھنس چکے ہیں کہ اب ہمارے معاشی فیصلے براہ راست وہاں سے آتے ہیں۔

کیا وقت تھا، ہم جنرل مشرف صاحب کے دور میں روز سنتے تھے کہ فلاں قرضے ری شیڈول ہوگئے، فلاں قرضوں میں یہ رعائت مل گئی اور یہ ریویو بھی بہترین ہوگیا اور اتنے بلن ڈالر آبھی گئے۔ جنرل مشرف صاحب پر یہ کرم نوازیاں ان کی امریکی خدمت گزاری کا نقد انعام تھیں۔ جنرل مشرف نے ہزاروں پاکستانیوں کو امریکی حملوں میں مروا دیا، پرائی جنگ کو ہمارے گھر تک لے آیا، ہم آج بھی اس کے نتائج بھگت رہے ہیں۔ اس سب کا نقد انعام بہرحال اس نے وصول کیا۔ خیر ہماری مالی حالت کو بہت برا کہا جا رہا ہے کہ ہمارے پاس زرمبادلہ کے چار ارب ڈالر سے کم کے ذخائر رہ گئے ہیں۔ اس سے ہم ایک ماہ کی امپورٹس بھی بڑی مشکل سے کرسکتے ہیں۔ ہم نے ایل سی کھولی ہے اور چاہتے ہیں کہ ہم ایل جی پی گیس خرید لیں، دنیا کی کسی کمپنی نے کوئی دلچسپی ظاہر نہیں کی اور ہماری ریاست کی تحقیر ہوگئی کہ دنیا کی کسی کمپنی کو اعتبار نہیں ہے کہ ہم گیس لے کر پیسے کہاں سے دیں گے۔؟

در حالانکہ ہمارے وزیر خزانہ کہہ رہے ہیں کہ ہم ڈیفالٹ نہیں کریں گے اور پاکستان نے تمام ادائیگیاں بروقت کر دی ہیں۔ دنیا دیکھ رہی ہے کہ اس ملک نے اگلے ایک سال میں پچیس ارب ڈالر دینے ہیں، یہ کیسے دے گا؟ کیونکہ ظاہری صورتحال کافی مشکل لگ رہی ہے۔ ڈار صاحب نے درست خدشے کا اظہار کیا کہ آئی ایم ایف چاہتا ہے کہ ہم ڈیفالٹ کریں اور پھر یہ لوگ ہمارے ساتھ ہماری مرضی کے مطابق مذاکرات کریں۔ یہ خود ایسے حالات پیدا کرتے ہیں، جس میں کسی آزادی خواہاں ملک کے پاس کوئی اور آپشن ہی نہیں رہتا۔ اگر ابھی پاکستان کو چائینہ کے بنک بیل آوٹ نہ کرتے تو اب تک پاکستان ڈیفالٹ کرچکا ہوتا۔ کچھ عرصے سے پلان بی کی بازگشت سنی جاری تھی اور کل پاکستان کی تاریخ کا ایک ہم اور تاریخی فیصلہ ہوا۔ اگر اس پر مکمل عمل درآمد کر لیا جائے تو ہماری سمت درست ہوسکتی ہے۔

سپیشل انویسٹمنٹ کونسل کا قیام عمل میں لایا گیا ہے، اس میں وفاق، صوبے اور پاکستان فوج بڑے سٹیک ہولڈر کے طور پر شامل ہیں۔ بہت سے ماہرین کہہ چکے ہیں کہ اس کی ضرورت ہے۔ ڈاکٹر حفیظ پاشا نے کہا ریفارمز کے لیے ایک کمیٹی کی ضرورت ہے۔ شبر زیدی صاحب بھی کہہ چکے ہیں کہ اکانومی کو سیاست سے الگ کر دیں، اکنامکس کی پالیسی پندرہ سال ایک ہو، چیمبر آف کامرس کے غیاث الدین بھی یہی تجویز دے چکے ہیں کہ ایسی ایک کمیٹی بنانا ہوگی۔ کافی عرصے سے چارٹر آف اکانومی کی بات ہو رہی تھی۔ کچھ فیصلے ریاستی سطح پر کر لیے گئے ہیں۔ کاش یہ بیس سال پہلے کر لیتے، بہرحال اب کر لیے گئے ہیں۔ اب آرمی چیف کو بھی اس میں شامل کرکے فوج کو ایک شراکت دار کے طور پر کردار دیا گیا ہے۔ اس میں تین شعبوں میں سرمایہ کاروں کو مکمل سہولیات دینے کا فیصلہ کیا گیا ہے۔ زراعت، معدنیات اور آئی ٹی شامل ہیں۔