ہماری زمین کا درجہ حرارت مختلف وجوہات سے بڑھتا ہے جن میں سر فہرست زمین پر پڑنے والی سورج کی عمودی کرنیں ہیں جو سیدھی زمین پر پڑتی ہیں. اس کے علاوہ ماحولیاتی آلودگی اور قدرتی مظہر ال نینو اور لا نینا بھی ہیں.
ال نینو اور لا نینا آب و ہوا کے دو ایسے پیٹرنز ہیں جو ایک دوسرے کے مخالف ہوتے ہیں اور یہ عام حالات میں آب و ہوا کے نظام کو بدل دیتے ہیں۔ سائنس دان ان مظاہر کو El Niño-Southern Oscillation (ENSO) سائیکل کہتے ہیں۔

عام حالات میں مشرقی سمندر کا پانی ٹھنڈا ہوتا ہے اور مغربی سمندر کا پانی گرم ہوتا ہے. بحرالکاہل کے وسط میں پانی گرم ہوتا ہے اور خط استوا کے ساتھ چلنے والی جنوب مشرقی ہوائیں اس گرم پانی کو مغرب کی سمت آسٹریلیا اور اس کے اس پاس کے ممالک کی جانب لے کر جاتی ہیں. ان ہواؤں کو جنوب مشرقی ٹریڈ ونڈز یعنی South East trade winds کہتے ہیں. یہ ہوائیں اس ریجن میں بادلوں کو بننے میں مدد دیتی ہیں اور پھر آسٹریلیا اور آس پاس کے ممالک میں اچھی خاصی بارش ہو جاتی ہے. لو پریشر سے اٹھنے والی ہوائیں، جنوبی امریکہ کے مغربی کنارے پر موجود ہائی پریشر کی جانب سفر کرتی ہیں اور وہاں سمندر کی گہرائیوں سے ٹھنڈا پانی اوپر کی جانب آ جاتا ہے جسے upwelling کہتے ہیں۔ اپ ویلنگ کی وجہ سے nutrient rich cold water اوپر آ جاتے ہیں اور ماہی گیر کافی تعداد میں مچھلیاں پکڑ لیتے ہیں.

ال نینو El Niño…….
ال نینو ہسپانوی زبان کا لفظ ہے جس کا مطلب ہے چھوٹا لڑکا. ال نینو وسیع پیمانے پر واقع ہونے والا ایک ایسا قدرتی مظہر ہے جس کے نتیجے میں بحر الکاہل کے پانی کا بڑا حصہ معمول سے کہیں زیادہ گرم ہوجاتا ہے اور زمین کے مجموعی درجہ حرارت میں اضافے کی وجہ بھی بنتا ہے.
ال نینو خط استوا پر چلنے والی ٹریڈ ونڈز کو کمزور کرتا ہے جس کی وجہ سے زیادہ تر سمندری گرم پانی مشرق سے مغرب کی سمت حرکت کرنے لگ جاتا ہے اور جنوبی امریکہ کے مغربی کناروں پر اکٹھا ہو کر لو پریشر بنا دیتا ہے۔ لو پریشر کی وجہ سے بارشیں شروع ہو جاتی ہیں اور neutral rich cold water کی upwelling رک جاتی ہے. اپ ویلنگ کے رکنے کی وجہ سے مچھلیاں سطح سمندر پر نہیں آتی ہیں اور ماہی گیروں کو بھاری نقصان اٹھانا پڑتا ہے. اس کے برعکس آسٹریلیا میں ہائی پریشر بن جاتا ہے اور بارشیں نا ہونے کے سبب خشک سالی ہو جاتی ہے اور جنگلات میں آگ بھی لگ جاتی ہے.

لا نینا La Niña…..
لا نینا دراصل ال نینو کا الٹ ہے جس میں خط استوا پر چلنے والی ٹریڈ ونڈز بہت زیادہ طاقت ور ہو جاتی ہیں اور گرم پانی کی زیادہ مقدار آسٹریلیا کے مشرقی کناروں اور آس پاس کے ممالک میں اکٹھی ہو جاتی ہے. آسٹریلیا کے مشرقی کناروں پر لو پریشر بن جاتا ہے اور ریجن میں بارشیں شروع ہو جاتی ہیں. آسٹریلیا میں بننے والا لو پریشر ہواؤں کو Mascarene Island کی جانب بھیج دیتا ہے جس کی وجہ سے اس جزیرے پر ہائی پریشر بہت طاقتور ہو جاتا ہے اور پھر وہاں سے چلنے والی تیز ہوائیں بادلوں کو بھارت اور پاکستان میں دھکیل دیتی ہیں جو مون سون کی بارشوں کا سبب بنتے ہیں. لا نینا کی وجہ سے مشرقی ایشیا میں مون سون کی بارشیں ہوتی ہیں.