.اہم نوٹ: یہ کالم 15مارچ 2019کو ’’جنگ‘‘ میں شائع ہو چکا۔ ’’مکرر ارشاد‘‘ کیونکہ بوجوہ سوشل میڈیا پر وائرل ہے۔’’مسجد کی غیر قانونی توسیع خلافِ اسلام، سرکاری زمین پر مدرسہ صرف حکومت بنا سکتی ہے‘‘ :سپریم کورٹ’’لال مسجد کا رقبہ کتنا؟ زمین کس کی ملکیت ہے؟‘ :جسٹس گلزار’’ایسے سوالات کے جواب دینا مناسب نہیں سمجھتا‘‘:وکیل لال مسجداللہ بخشے ہمارے دوست تھے میجر رشید وڑائچ، دبنگ، ملنگ، دردِ دل رکھنے والا ایک بےچین، بےقرار آدمی جو پاکستان کو ہر برائی سے پاک دیکھنا چاہتا تھا۔

عمر کے آخری حصے میں میجر صرف ’’مسجد مرکز تحریک‘‘ کو اپنی زندگی کا مقصد و محور بنا چکے تھے۔ وہ اس خیال سے مسحور تھے کہ اگر مسجد صحیح معنوں میں ہماری زندگیوں کا مرکز بن جائے تو بےتحاشا مسائل و مصائب سے معاشرہ کو نجات مل سکتی ہے۔

جن دنوں اس آئیڈیا پر برین سٹارمنگ ہو رہی تھی … ’’بیلی پور‘‘ میں ایک میٹنگ کے دوران کسی دوست نے کہا ’’بہت سی مساجد تو خود تجاوزات میں ملوث یا قبضہ کی زمینوں پر ہوتی ہیں‘‘۔ تو میجر صاحب بولے … ’’اس میں مسجد کا تو ظاہر ہے کوئی قصور نہیں، مخصوص ذہنیت کار فرما ہوتی ہے جس کی وجہ لاعلمی اور بےخبری بھی ہو سکتی ہے اور اکثر یہ بھی ہوتا ہے کہ بےچارہ مولوی مجرم نہیں ہوتا، مجرم نے اس کا حلیہ چرایا ہوا ہوتا ہے‘‘۔

اصل بات یہ کہ ابتدائی طور پر مسجد تو تھی ہی کثیر المقاصد جسے آج کی عام زبان میں ’’کمیونٹی سنٹر‘‘ کہہ لیں۔ سب سے بڑی مثال خود مسجد نبویؐ جو ہر اعتبار سے مسلمانوں کا محور و مرکز تھی۔

یہ تو علامت ہے تعلیم، تربیت، تنظیم، تہذیب، تمیز، ترتیب، توازن، تفکر اور ہر قسم کے نظم و ضبط یعنی ڈسپلن کی جس میں جسمانی، فکری، سماجی، روحانی، نفسیاتی، جذباتی غرضیکہ ہر قسم کا ڈسپلن شامل ہے جس کی پہلی اینٹ ہی پابندیٔ اوقات ہے، صفیں سیدھی رکھنے کا مطلب ہے زندگی کا ہر معاملہ سیدھا رکھنا، چھل فریب سے پاک معاملات اور طرزِ زندگی۔

وضو بھی ظاہر ہے جسمانی اعضا کی صفائی تک ہی محدود نہیں بلکہ آنکھ سے لے کر روح تک کی پاکیزگی بھی اس میں شامل ہے اور سجدہ … سبحان اللہ۔وہ ایک سجدہ جسے تو گراں سمجھتا ہےہزار سجدوں سے دیتا ہے آدمی کو نجات سوچ سمجھ کر دیا ہوا ایک سجدہ زمین کو زمینی خدائوں سے پاک کر سکتا ہے۔

پورے معاشرے کو زندہ بتوں اور ان کے استحصال سے نجات دلا سکتا ہے، لیکن سجدہ سچا ہو، اتنا سچا کہ تیر جسم میں پیوست تھا اور نکالنا محال تو فرمایا ’’جب سجدہ میں جائوں تو نکال لینا کہ سجدہ کے دوران خوفِ خدا سے فولادی جسم موم ہو چکا ہوتا ہے۔‘‘ باجماعت نماز کا مطلب صرف کندھے سے کندھے ملانا نہیں کہ اصل ہدف تو دلوں کو دلوں سے ملانا ہے۔

تو جو سربسجدہ ہوا کبھی تو زمیں سے آنے لگی صداترا دل تو ہے صنم آشنا تجھے کیا ملے گا نماز میںسجدہ سچا ہو تو پرشیا، روما جیسی سپرپاورز بھی سرنگوں ہو جاتی ہیں، اگر اس میں کھوٹ ہو تو ’’تجھے کیا ملے گا نماز میں؟‘‘ والی کبھی نہ ختم ہونے والی رات مقدر ہو جاتی ہے۔

مسجد اور تجاوزات مسجد اور قبضہ کی زمین پریہ تو ممکن ہی نہیں اور اگر کہیں ایسا ہے تو وہ مسجد ہی نہیں کہ سجدوں میں بھی فرق ہوتا ہے۔ سچا سجدہ تو زندہ معجزہ ہوتا ہے جو دنیا کی امامت کے در کھول دیتا ہے اور یہ صدیوں پہلے ہو بھی چکا۔دوسرے موضوع کا تعلق بھی تعلیم و تربیت، تفکر و تدبر سے ہے۔ وومنز ڈے پر کچھ بیبیوں نے اسلام آباد میں کوئی ایسا عورت مارچ کیا جس کی گونج ابھی تک فضائوں میں ہے۔

تفصیلات کو چھوڑیں صرف اس مارچ کے مرکزی خیال پر غور فرمائیں۔’’میراجسم میری مرضی‘‘بالکل صحیح بات ہے … سو فیصد درست۔اگر جسم تمہارا ہے تو مرضی بھی یقیناً تمہاری چلے گی اور چلنی چاہئے، لیکن کیا واقعی یہ جسم تمہارا ہے؟

یا خالق و مالک و رازق کی امانت ہے جو چند سانسوں، چند برسوں کے لئے امانت کے طور پر تمہیں سونپا گیا تو خود ہی سوچ لو دیانت کا تقاضا کیا ہے۔جان دی، دی ہوئی اسی کی تھی حق یوں یہ ہے کہ حق ادا نہ ہواجسم ہمارا تمہارا ہوتا تو خود کشی حرام نہ ہوتی۔یہاں کچھ بھی تو ہمارا تمہارا نہیںکیا ہم اپنی مرضی سے پیدا ہوتے ہیں؟

کیا ہمیں ماں باپ کے انتخاب کا اختیار ہے؟کیا ہم بہن بھائی خود منتخب کرتے ہیں؟کیا ہم پیدا ہونے کے لئے گھر، خاندان، شہر، ملک یہاں تک کہ مذہب کا بھی اختیار رکھتے ہیں؟کیا ہمیں اپنی شکل صورت، رنگ، جسامت، افتاد طبع پر کسی بھی قسم کا کوئی اختیار ہے؟

کیا موت ہمارے اختیار میں ہے؟نہیں … ہرگز نہیں نیک دل بیبیو!جسم تو کیا … یہاں کچھ بھی ہمارا نہیں کہ ہم تو اپنے بلڈ گروپ کے سامنے بھی بے بس ہیں۔اور یہی اصل کام، اصل امتحان ہے

’’اک آگ کا دریا ہے اور ڈوب کے جانا ہے‘‘۔نہ جسم میرا، نہ مرضی میری نہ آغاز مرے بس میں نہ انجام مرے بس میں لائی حیات آئے، قضا لے چلی چلےاپنی خوشی نہ آئے نہ اپنی خوشی چلے