شام کے دھندلکے میں جب میں پرانے اسٹیشن پر پہنچا تو یوں محسوس ہوا جیسے وقت نے اچانک اپنی رفتار سست کر دی ہو۔ پلیٹ فارم پر بکھرے سوکھے پتے، زنگ آلود لوہے کی بنچیں اور دیوار پر لٹکی ہوئی بند گھڑی کسی گزرے ہوئے زمانے کی خاموش داستان سنا رہے تھے۔ کبھی یہی اسٹیشن زندگی سے بھرپور ہوا کرتا تھا۔ مسافروں کی آوازیں، قلیوں کی پکار، چائے والوں کی صدائیں اور انجن کی سیٹیاں اس کی پہچان تھیں۔ آج وہاں ایک عجیب سی خاموشی تھی، جیسے کسی نے زندگی کے شور کو ایک ہی لمحے میں سمیٹ لیا ہو۔
میں تقریباً تیس برس بعد اس اسٹیشن پر آیا تھا۔اسٹیشن کے باہر نیم کا وہ بوڑھا درخت اب بھی موجود تھا جس کے نیچے بچپن میں ہم دوست چھپن چھپائی کھیلا کرتے تھے۔ اس کی شاخیں پہلے سے زیادہ جھکی ہوئی تھیں۔ میں نے درخت کے تنے پر ہاتھ رکھا تو جانے کیوں دل میں ایک عجیب سی کسک جاگ اٹھی۔ شاید درخت مجھے پہچان گیا تھا، یا شاید میں خود اپنے بچپن کو پہچاننے کی کوشش کر رہا تھا۔پلیٹ فارم کے آخری سرے پر ایک بوڑھا شخص بیٹھا تھا۔ سفید داڑھی، جھکی ہوئی کمر اور ہاتھ میں لکڑی کی چھڑی۔ اس کے سامنے ایک چھوٹا سا بکس رکھا تھا۔ وہ بار بار پٹڑیوں کی طرف دیکھتا، پھر اپنی جیب سے ایک پرانی گھڑی نکال کر وقت دیکھنے لگتا۔
میں اس کے قریب جا کر بیٹھ گیا۔”بابا جی! کسی کا انتظار ہے؟“اس نے میری طرف دیکھا۔ اس کی آنکھوں میں عجیب سی روشنی تھی۔”ہاں بیٹا، ایک مسافر کا۔“”کون ہے وہ؟“بوڑھے نے مسکرا کر کہا، ”میرا بیٹا۔ بہت سال پہلے یہاں سے گیا تھا۔ کہتا تھا، ابا! جلد واپس آؤں گا۔ بس اسی جلدی کا انتظار کر رہا ہوں۔“میں خاموش ہو گیا۔ اس کی آواز میں شکایت کم اور اُمید زیادہ تھی۔ مجھے محسوس ہوا کہ بعض انتظار ایسے ہوتے ہیں جنہیں عمر بھی شکست نہیں دے سکتی۔
”کیا وہ کبھی واپس نہیں آیا؟“ میں نے پوچھا۔بوڑھے نے اپنی گھڑی پر نظر ڈالی۔”آجائے گا۔ کچھ لوگ دیر سے آتے ہیں، مگر آتے ضرور ہیں۔“
اس کے اس جواب نے میرے اندر کوئی پرانا دروازہ کھول دیا۔ مجھے اپنے والد یاد آگئے۔ وہ بھی اکثر سفر پر جاتے ہوئے یہی کہا کرتے تھے، ”بیٹا، جلد واپس آؤں گا۔“ میں اس وقت چھوٹا تھا۔ ان کے جانے پر اسٹیشن کی کھڑکی سے ہاتھ ہلاتا رہتا، یہاں تک کہ ریل گاڑی دھوئیں کے بادل میں گم ہو جاتی۔پھر ایک دن وہ سفر پر گئے تو واپس نہ آئے۔
زندگی نے مجھے شہر کی مصروف گلیوں، روزگار کی الجھنوں اور ذمہ داریوں کے درمیان ایسا الجھایا کہ میں اپنے بچپن کے اس اسٹیشن کو بھولتا چلا گیا۔ والد کی یاد بھی وقت کے ساتھ دل کے کسی خاموش گوشے میں جا بیٹھی تھی۔اسی دوران اسٹیشن کے پرانے کمرے سے ایک شخص باہر آیا۔ وہ اسٹیشن ماسٹر تھا۔ اس نے مجھے غور سے دیکھا اور پوچھا:”آپ کسی کو تلاش کر رہے ہیں؟“میں نے کہا، ”نہیں، بس پرانی یادیں دیکھنے آیا ہوں۔“وہ کچھ دیر مجھے دیکھتا رہا، پھر بولا، ”آپ شاید برک صاحب کے بیٹے ہیں؟“
میرے قدم جیسے زمین میں جم گئے۔”آپ میرے والد کو جانتے تھے؟“اس نے سر ہلایا اور اپنے کمرے میں لے گیا۔ لکڑی کی ایک پرانی الماری کھولی۔ اس میں رجسٹروں، کاغذوں اور چند زرد پڑے لفافوں کے درمیان ایک خط رکھا تھا۔”یہ آپ کے والد نے میرے پاس امانت رکھا تھا۔ کہا تھا کہ اگر کبھی ان کا بیٹا واپس آئے تو اسے دے دینا۔“
میرے ہاتھ کانپنے لگے۔ میں نے لفافہ کھولا۔ کاغذ پر والد کی تحریر تھی:”میرے پیارے بیٹے!اگر تم یہ خط پڑھ رہے ہو تو شاید میں تمہارے پاس نہیں ہوں۔ زندگی نے مجھے ایسے سفر پر بھیج دیا ہے جس کی واپسی میرے اختیار میں نہیں۔ میں نے تم سے وعدہ کیا تھا کہ جلد واپس آؤں گا، مگر بعض وعدے انسان نہیں، حالات توڑ دیتے ہیں۔بیٹا! جب کبھی اس پرانے اسٹیشن پر آنا تو سمجھنا کہ میں تمہارے قریب ہوں۔ تمہارا بچپن، تمہاری ہنسی اور تمہاری معصوم آنکھیں میرے ساتھ ہمیشہ سفر کرتی رہی ہیں۔
اپنے دل میں کسی کے لیے نفرت نہ رکھنا۔ زندگی مختصر ہے، مگر محبت کا سفر بہت طویل۔تمہارا باپ۔“
خط پڑھتے پڑھتے میری آنکھیں دھندلا گئیں۔ میں نے کاغذ کو سینے سے لگا لیا۔ برسوں سے دل میں موجود ایک سوال خاموشی سے اپنے جواب تک پہنچ چکا تھا۔باہر بوڑھا اب بھی پٹڑیوں کی طرف دیکھ رہا تھا۔میں اس کے قریب گیا۔ اس نے پوچھا، ”خط مل گیا، بیٹا؟“میں حیران رہ گیا۔اس نے مسکرا کر کہا، ”تمہارے والد بھی یہاں بہت انتظار کیا کرتے تھے۔“اسی لمحے دور سے ایک ریل گاڑی کی سیٹی سنائی دی۔ پلیٹ فارم پر ہلکی سی جنبش پیدا ہوئی۔ بوڑھا شخص اٹھ کھڑا ہوا۔ اس کی آنکھوں میں اُمید کی روشنی پہلے سے زیادہ نمایاں تھی۔ریل گاڑی گزری، مسافر اترے، کچھ چڑھے، اور پھر وہ اپنے راستے پر روانہ ہو گئی۔
بوڑھا دوبارہ بنچ پر بیٹھ گیا۔میں نے اس سے پوچھا، ”بابا جی، آپ کب تک انتظار کریں گے؟“اس نے آسمان کی طرف دیکھا اور دھیرے سے کہا:”جب تک دل میں اُمید باقی ہے، انتظار بھی باقی ہے۔“
میں وہاں سے روانہ ہو گیا، مگر میرا دل اب بھی اسی پلیٹ فارم پر بیٹھا تھا۔اس روز مجھے احساس ہوا کہ اسٹیشن کبھی بوڑھے نہیں ہوتے۔ بوڑھے تو وہ لوگ ہوتے ہیں جن کی آنکھوں میں کسی کی واپسی کا خواب عمر بھر سفر کرتا رہتا ہے۔اور شاید ہر انسان کے اندر ایک پرانا اسٹیشن آباد ہوتا ہے، جہاں وقت گزر جاتا ہے، مسافر بچھڑ جاتے ہیں، مگر یادیں کسی نامعلوم ریل گاڑی کی آمد کی منتظر رہتی ہیں۔
کچھ راستے منزل تک نہیں پہنچتے، مگر دل میں ہمیشہ کے لیے محفوظ ہو جاتے ہیں۔
پرانا اسٹیشن بھی ایسی ہی ایک جگہ تھا؛ جہاں ریل گاڑیاں تو گزر جاتی تھیں، مگر محبت کبھی رخصت نہیں ہوتی تھی۔
(ڈاکٹر شفیق آصف کی نثری نظم سے ماخوذ)


